Status i 2026

Tertialrapport per 31.august 2026 viser at Sunnfjord kommune styrer mot eit positivt netto driftsresultat på 23,7 millionar kroner, tilsvarande 0,9 prosent av driftsinntektene.

Samstundes har fleire tenesteområde høgare utgifter enn budsjettert. Det samla meirforbruket er estimert til 36,3 mill. kroner, særleg innan helse og omsorg og oppvekstsektoren. Betre utvikling i skatt, rammetilskot og finansinntekter enn tidlegare venta bidreg til å finansiere 12,3 mill. kroner av meirutgiftene.

For å dekke meirforbruket blir avsetjinga til disposisjonsfondet redusert med 24 mill. kroner samanlikna med budsjettert. Disposisjonsfondet er likevel venta å auke tilsvarande driftsresultatet på 23,7 mill. kroner til om lag 34 millionar kroner ved utgangen av 2026.

Resultatet er ei klar betring frå 2025, då netto driftsresultat var 3,3 millionar kroner. Til trass for positiv utvikling er driftsresultatet under handlingsregelen om 2 prosent av driftsinntektene og disposisjonsfondet er venta å utgjere om lag 1,3 % av driftsinntektene, som er under måltal om 8 prosent. Dette gir låg buffer for uføresette hendingar og lite handlingsrom. Resultatet for 2026 syner at det framleis er eit stort behov for å sikre god måloppnåing av vedtekne innsparing- og omstillingskrav planperioden. 

Årsbudsjett, økonomi- og handlingsplan 2027-2030

Årsbudsjett, økonomi- og handlingsplan 2027-2030 tek utgangspunkt i vedteken økonomiplan for 2026-2029 justert for løns- og prisvekst, endringar i omstilling- og innsparingskrav og nye tiltak. Forslag til statsbudsjett for 2027, tidlegare vedtekne innsparingskrav og gjeldande handlingsreglar set rammene for investeringsplanen. 

Forslaget til årsbudsjett, økonomi- og handlingsplan er nøkternt og har ambisiøse krav til innsparing og omstilling, men sikrar god økonomisk utvikling og ein berekraftig økonomi i tråd med vedtekne handlingsreglar mot slutten av planperioden ved god måloppnåing. 

Lite handlingsrom i statsbudsjettet

Framlegget til statsbudsjett for 2027 gir ein økonomisk realvekst til kommunesektoren på om lag 400 millionar kroner nasjonalt. For Sunnfjord kommune tilsvarer dette eit teoretisk handlingsrom på rundt 1,6 millionar kroner. Samstundes ventar kommunen at høgare rentenivå vil auke netto renteutgifter med om lag 7,5 millionar kroner i 2027 samanlikna med 2026. Resultatet er at handlingsrommet i praksis blir negativt. 

Omstilling som følgje av demografi

I økonomiplanen er det innarbeidd forventa endringar i folketalet dei komande åra basert på SSB sine prognosar. Sunnfjord får færre barn i barnehage- og skulealder, medan talet på eldre aukar. Budsjettrammene er justerte i tråd med forventa behov for tenester i planperioden. KS sin demografimodell vert lagt til grunn for berekningane og justeringar som følgje av endra demografi vert gjort årleg i samband med ny økonomiplanperiode. 

Staten kompenserer nettoeffekten av den demografiske utviklinga, men kommunen må sjølv gjennomføre omdisponering frå tenesteområda som har reduksjon i tenestebehovet til å finansiere områder med vekst i behovet. 

Innsparingskrav blir fordelte over fleire år

Sunnfjord kommune held fast ved vedtekne mål for innsparing, men tidspunktet for økonomisk effekt blir justert. I gjeldande økonomiplan er det vedteke ytterlegare innsparingskrav på 91,1 millionar kroner med effekt frå 1. januar 2027. Det ytterlegare innsparingskravet vert no fordelte over perioden 2027–2029 i tråd med status i delprosjekt for innsparing og omstilling. Dette inneber innsparing på 41,6 millionar kroner i 2027, ytterlegare 30,4 millionar kroner i 2028 og 19,1 millionar kroner i 2029. 

Nøktern investeringsplan

Forslaget til investeringsplan legg til grunn at lånegjelda til eigne investeringar ikkje skal auke. Høgare rentenivå gjer at kommunen må prioritere investeringar nøye og oppnå økonomisk berekraftig drift for å få handlingsrom til uløyste investeringsbehov knytt til mellom anna brannstasjon, symjehall og mogelege strukturendringar innan barnehage og kjøkken. Nytt omsorgssenter i Førde og tidlegare vedtekne investeringar i Sande skule og Førde barneskule er prioritert. 

Utvikling i handlingsreglar

Prognosen for 2026 og framlegg til økonomiplan 2027–2030 viser ei gradvis betring i kommunen sine økonomiske handlingsreglar og god økonomisk berekraft mot slutten av planperioden. 

Netto driftsresultat styrkar seg samanlikna med dei siste åra og aukar frå 3,1 % i 2027 til over 4 % mot slutten av planperioden. 

Disposisjonsfondet er venta å vekse gjennom perioden som følgje av positive driftsresultat og vere i tråd med måltal om 8 % av driftsinntekter ved utgongen av 2028. 

Netto lånegjeld vil også ha ei gradvis positiv utvikling og vere i tråd med måltal om 90 % av driftsinntekter i 2029. Utvikling i netto lånegjeld vil bli påverka av framdrift i sal av tomter knytt til Sunnfjord næringspark.

Skissert utvikling i handlingsreglar tek utgangspunkt i full måloppnåing på vedtekne innsparing- og omstillingskrav og ingen nye økonomiske utfordringar i planperioden. Ved god måloppnåing gir forslag til økonomiplan eit handlingsrom til drift- og investeringsføremål mot slutten av planperioden.  

Vidare behandling

Framlegg til årsbudsjett og økonomiplan skal no gjennom den ordinære politiske behandlinga. Formannskapet skal etter planen leggje budsjettet ut til offentleg ettersyn 26. november, før endeleg vedtak i kommunestyret 17. desember.