Entreprenørservice AS skal opparbeide interne vegar og anlegg for vatn, overvatn, avløp og el-installasjonar. Det blir også bygd gang- og sykkelveg langs fylkesvegen frå brua over Jølstra fram til avkøyringa til K2 og K3. 

Dei tre områda K2, K3 og K4 skal vere ferdig opparbeidd i november 2027, men alt på vårparten vil Sunnfjord Miljøverk starte arbeidet sitt med å etablere ein ny gjenbruksstasjon. Dei disponerer nesten 50 dekar på felt K3.

Titan Group/Lefdal Mine Datacenter har inngått avtale om kjøp av ca 40 dekar for å etablere datasenter. Også firmaet ARCEM vil bygge datasenter og har opsjon på ca 40 dekar til dette føremålet på K2. Dei har meldt tilbake at dei vil løyse inn opsjonen.

På området K4 har firmaet Fazenda opsjon på kjøp av ca 10 dekar for å etablere lagerfunksjonar.

I arealplanen til Sunnfjord kommune er det også sett av eit utvidingsareal på ca 85 dekar (K5). Ca 68 dekar av dette har kommunen hand om, men det må utarbeidast reguleringsplan før dette området kan byggast ut.

Informasjonsmøte 

I starten av oktober arrangerte kommunen og Invest in Fjordane informasjonsmøte der formannskapet og naboar var spesielt invitert. Entreprenørservice AS informerte om arbeidet med å opparbeide næringsparken. Sunnfjord Miljøverk, Lefdal Mine Datacenter og ARCEM presenterte sine planar. Smakslandet Sunnfjord serverte sitt nye konsept, og alle fekk verkeleg kjent på gode smakar frå Sunnfjord.

Smakslandet Sunnfjord er ei langsiktig satsing for å styrke verdiskapinga i Sunnfjord gjennom eit tettare og meir målretta samspel mellom landbruk, matkultur og reiseliv. Prosjektet tek utgangspunkt i regionen sine rike naturgjevne føresetnader, levande landbruk og sterke mattradisjonar, og har som mål å utvikle Sunnfjord til ein tydeleg og attraktiv matregion – både for innbyggjarar, næringsliv og besøkande.