Godt førebudde då straumen gjekk

I veke 44 har det vore nasjonal beredskapsveke. På Vassenden skule har både elevar & tilsette brukt veka på å lære å ta vare på seg sjølv og familien sin dersom ei krise oppstår. Ein finn mange gode tips på  Nettsida om eigenberedskap Nettsida har vore i flittig bruk heile veka, så då straumen gjekk på skulen fredag 30.10.26 var elevane godt førebudde. Dei stilte med gode ullklede og fleire hadde hovudlykt i sekken, slik at dei kunne gjere skulearbeid i dei mørke klasseromma, og orientere seg rundt i dei beksvarte gangane. 

 

Kan skulen fungere utan straum og varme?

Nasjonale styringsdokument skriv at skulane skal halde ope sjølv om straumen går i dagevis. Går det eigentleg å drive skule utan straum & varme i dagevis? Det måtte dei tilsette både svare på og øve på. Vi oppdaga undervegs at det at vi er ein skule med god erfaring med fysisk aktiv læring, som likar å tenke praktisk undervisning og som er mykje ute, så hadde vi ein stor fordel. For utan straum,  varme og tilgang på digitale duppedingsar, må vi tenke heilt annleis når undervisningsopplegga skal lagast! 1. - 4. klasse har øvd på å tenne bål, og har lært at det er lurt å ha opptenningsved. Vi har og hatt god nytte av nettsida Forsvarleg , som er laga for å gje undervisningspersonell gode  tips for å halde undervisninga i gang i ein krisesituasjon. 

 

Læring om kriser og eigenberedskap

Det har vore mange og varierte læringsaktivitetar i 1. – 10 klasse gjennom heile beredskapsveka. I 1. klasse har elevane fått høyre forteljing frå ein av dei tilsette som har opplevd krisa kome i Ukraina, der straumbrot og vassmangel kom brått på ein uførebudd nasjon. I alle klassar har elevane fått jobba med si eiga sjekkliste for eigenberedskap, og vore oppmoda til å snakke litt med dei heime om kva som er lurt å ha på plass for å ta vare på seg sjølv, familien sin og naboane sine. 

Dataspel som skapar engasjement

Spelet «Krise», som er laga av NDLA er tilpassa for bruk i skulen. Spelet utfordrar elevane på spørsmål som; Kva gjer du når ei alvorleg krise oppstår? Kva problem må du løyse for å overleve? Litt skummelt for undervisningspersonell å servere elevane eit så alvorleg tema, men veldig lærerikt for elevane. Spelet skapte skikkeleg engasjement i dei klassane som brukte det, på mellomsteg og ungdomsskulesteg. Eit spel vi godt kan bruke fleire gangar! 

Kva skjer når samfunnet stoppar opp?

Elevane i dei eldste klassane har sett NRK dokumentaren «Katastrofe». Den har fleire episodar som viser korleis ting vil bli i samfunnet vårt dersom t.d. straumen går og satellittane sluttar å virke. For kva skjer eigentleg då i det norske samfunn? 

Beredskapsplanar og evakueringsøving

Alle skular skal ha beredskapslanar , og leiinga har nytta beredskapsveka til å oppdatere skulen sin beredskapsplan. Planen må innehalde informasjon om korleis skulen skal handtere uønska alvorlege hendingar, som t,d. naturkatastrofe der skulen må evakuere, skuleskyting, eller andre typar alvorlege åtak og trugslar. Korleis få ut informasjon på skulen? Kvar skal vi gå dersom vi må evakuere skulen? Kan Jølster Skisenter vere ein slik stad? Det er mange vegar å ta frå Vassenden skule til Jølster Skisenter. Klarar alle elevar å ta seg dit? Dette vart også testa ut i beredskapsveka. 

 

Ei veke fylt med læring og meistring

Dette har vore ei svært lærerik og engasjerande veke for både elevar og tilsette. Gjennom praktiske øvingar, refleksjonar og konkrete oppgåver har både vaksne og elevar fått kunnskap som ikkje berre er viktig på skulen, men også heime og i lokalsamfunnet. Det har vore imponerande å sjå kor raskt elevane tok ansvar, tenkte løysingar og viste forståing for korleis dei kan bidra til eigen og fellesskapet sin tryggleik.

Frå teori til verkeleg erfaring

Beredskapsveka synte kor verdifullt det er å kombinere teori og praksis. Når straumen faktisk gjekk fredag, fekk elevane erfare at kunnskapen dei hadde tileigna seg gjennom veka hadde direkte verdi. Vi håpar at beredskapsveka vår gjer læringa meir relevant, konkret og varig for elevane.

Ei anbefaling til alle skular

Vår klare anbefaling er at alle skular tek del i den nasjonale beredskapsveka. Dette er undervisning som styrkjer både kompetanse, sjølvstende, samarbeidsevner og samfunnsforståing. Samstundes bidreg ho til å gjere både elevar, familiar og lokalsamfunn betre rusta for å møte uventa hendingar.